今個夏天大賽一浪接一浪，女世盃、美洲盃及U21歐國盃正進行得如火如荼，今晚又有兩年一度嘅非洲國家盃開打，頭炮由東道主埃及喺A組迎戰津巴布韋。非國盃之王埃及雖有利物浦射手穆罕默德沙拿壓陣，但每逢征戰非國盃都分外謹慎，津巴布韋遇強必排鐵桶陣，主W太熱寧捧入球細。
（無綫 myTV Gold 301、Now 638、Now E、有線654及614台周六凌晨4時直播）
埃及過去7次贏得非國盃冠軍，係歷來捧盃次數最多球隊，而且佢哋對上4次參賽攞到3冠1亞，今屆更有主場之利，理所當然被捧為奪標大熱門；相反津巴布韋近8屆只曾3次打入決賽周，3次都喺分組賽出局，包括上屆3戰1和2負，表現差強人意，埃及要打響頭炮相信問題不大。
津巴布韋鐵桶陣頑抗
不過，埃及前線主要靠沙拿數胡，勢必受到嚴密看管，呢隊波又特別小心，近5場分組賽攞到4勝1和，僅入6球全部冇失波，總入球全開2球或以下，今場未必出現大手交易。津巴布韋除洛格倫前鋒梅蘇拿外，其他均屬烏合之眾，遇強必定玩死守，今場主W熱到得1.19倍冇肉食，主隊讓球半/兩球略嫌太多，轉捧入球細更穩陣。
