遇秘魯主守冇碇埋手
今晚美洲盃A組煞科戰，東道主巴西迎戰秘魯。「森巴兵團」雖被視為奪標大熱，但每次撞正死守球隊，初段總係老鼠拉龜冇碇埋手，加上仍未穩奪出線資格，今場碰上守強攻弱嘅秘魯，寧願睇定先食，2.4倍半場和捧得過。
（Now 650及Now E周日凌晨3時直播）
巴西開賽前雖有王牌尼馬因傷退隊，但從頭兩輪分組賽所見，加比爾捷西斯、羅拔圖法明奴及菲臘比古天奴組成嘅鋒線表現尚算對辦。可惜「森巴兵團」每次面對死守球隊，初段總係冇乜入波板斧，分組賽先後對玻利維亞同委內瑞拉，半場都只能踢成0比0。巴西依家兩戰得4分出線未十拿九穩，今仗初段未必敢貿然搶攻，以免陷於落後劣勢。
秘魯風格守強攻弱，前線靠「老大哥」法芬與荷西古里路數胡，首輪踢多個都只能悶和委內瑞拉，就算上仗大勝玻利維亞3比1，亦只因對手實力太弱，今戰遇強必先囤重兵喺後防。秘魯同巴西一樣手執4分，和波都冇壞，加上近7場美洲盃有5場保持清白身，其中6次半場同對手打和，證明秘魯初段堅守得，門將柏度加里斯領導嘅一條防線實而不華，雙方近4次交手有3次開半和，值得再追。
委內瑞拉大盤發維
同組另一場同時間開波賽事，玻利維亞鬥委內瑞拉，委內瑞拉有兩分喺手出線未絕望，前鋒祖斯夫馬天尼斯對親玻利維亞特別有計，近4次交手入咗4粒，呢4場兩軍合共炮製20個入波，捧2.5球大盤。
（Now 651及Now E周日凌晨3時直播）
