喺巴西舉行嘅美洲國家盃，聽朝同時間會上演兩場C組煞科戰，其中榜首智利火併烏拉圭。智利王牌阿歷斯山齊士（A山）返回國家隊即重拾信心頻士哥，協助球隊提早出線，烏拉圭鋒線孖寶蘇亞雷斯同卡雲尼亦火力全開，加上近年交手例演入球騷，2.5球嘅大盤不容錯過。
（Now 650及Now E周二早上7時直播）
哨牙蘇卡雲尼夾擊A山
連續兩屆美洲盃封王嘅智利，今屆衞冕之路開靚個頭，頭兩輪贏晒狂轟6粒，提早獲得出線資格堅有霸氣，今仗理應留力。不過王牌阿歷斯山齊士未必係咁諗，呢位上季喺曼聯入得兩粒嘅廢柴，返回國家隊立即翻生，頭兩輪已入兩球，信心返晒嚟，今屆美洲盃絕對係佢證明自己嘅最佳舞台，一向堅有鬥心嘅A山唔會hea踢。至於烏拉圭頭兩輪取得1勝1和，出線機會極大，因此冇乜心理包袱，鋒線孖寶蘇亞雷斯同卡雲尼都開咗齋，今屆合共有3球進帳，難怪烏軍已轟入6粒。而且雙方近4次碰頭，有3次開3球或以上，3大神鋒互鬥射術，捧2.5球大盤冇衰。
厄瓜多爾讓唔起日本
同組另一場厄瓜多爾硬撼日本，厄瓜多爾頭兩輪輸晒不特止，仲狂失6粒，而且兩場都有球員做「紅牌阿姑」，包括上輪有後衞阿基利亞喺末段被逐，今仗要坐波監，防線更加唔穩陣。至於應邀參戰嘅亞洲球隊日本，儘管首輪慘吞智利4蛋，幸好上仗靠三好康兒省兩粒，最終2比2打和烏拉圭，兩戰得1分，爭逐其中1支最佳第3名嘅出線席位仍未絕望，以久保建英為首嘅小將活力十足，絕對唔赦厄瓜多爾，何況厄軍近4次鬥亞洲球隊未贏過，冇本錢讓波，轉捧受讓平半嘅日本下盤。
（Now 651及Now E周二早上7時直播）
