今晚非洲國家盃頭場有D組首輪焦點戰，由「大象兵團」科特迪瓦硬撼南非。睇牌面科特迪瓦係贏晒，但呢班波個個各自為戰，不宜高估，讓唔起近期表現硬淨嘅南非，讓球客勝有計。
（myTV Gold 301、now 638、有線654及614台周一晚10時30分直播）
科特迪瓦仍屬非洲勁旅，但自從「魔獸」杜奧巴、耶耶托尼、高路托尼等退出國家隊後，就算有奧里亞、韋費特沙夏等英超兵助陣，亦未能阻止跌勢，唔單止喺上屆非國盃分組賽出局，更未能殺入上年世盃決賽周。論個人質素，科特迪瓦絕對唔曳，韋費特沙夏喺水晶宮單天保至尊嘅演出，令佢受到好多豪門垂青，不過「大象兵團」嘅問題在於個個都掛住自己踢，畀人一種散兵游勇嘅感覺，整體合作認真一般，唔係想像中咁勁。
南非近6對賽未輸過
南非今屆以土炮為主，毫無星味，較為出名嘅係法甲搵食嘅莫菲巴同基根杜尼，但正正因為冇球星，反而更加重視整體戰，加上南非聯賽近年水準不斷冒升，亦令國家隊得益，近8仗取得1勝7和未輸過，勝率唔高，但勝在硬淨唔易輸。翻查紀錄，佢哋近6次對住科特迪瓦，竟然錄得2勝4和不敗佳績，明顯格食格，仲有得受讓咁筍，讓球客勝咪錯過。
