祖記防線滴水不漏
女子世盃今晚上演最後2場16強大戰，頭場先有意大利女足火併「鏗鏘玫瑰」中國女足。意大利人天性愛防守，遇上向來守強攻弱嘅中國隊，相信入波唔會多，細盤好路。（有線603及604台周三凌晨零時直播）
意大利最後一輪分組賽雖然以0比1不敵巴西，不過仍以較佳得失球差壓過澳洲女足及巴西女足攞到C組首名資格。意大利女足同男子隊一樣都好着重防守，而且都係以國內勁旅祖雲達斯做重心。斑馬兵團女子隊雖然成立只係短短2年，不過連續2季都以無敵姿態喺聯賽封后，當中2季失球數字都係保持單位數，今屆意大利防線重心包括門將姬莉安妮及中堅兼隊長莎華加瑪都係嚟自祖記，足證球隊防守力有幾強。
中國女足開慣細盤
中國喺B組3戰得4分以小組第3名出線，不過整體表現唔算失禮，當中面對爭標熱門德國女足僅輸0比1，防守有一定板斧。賽前被視為進攻泉源、效力巴黎聖日耳門嘅中場王霜狀態平平，上場對西班牙踢咗半場多啲便被換出，來到淘汰賽場合，相信「鏗鏘玫瑰」會更加專注防守。中國女足近10場決賽周比賽有9次總入球開2球或以下，入球細乃不二之選。
