至於尾場16強會由荷蘭女足硬撼上屆亞軍日本女足。荷蘭近年成績突飛猛進，相反日本水準停滯不前，睇番荷蘭近4次對日本贏3次，反映兩軍實力此消彼長，捧主勝啱數。
（周三凌晨3時開賽）
王牌美迪瑪只得22歲
兩軍連續2屆於女世盃16強碰頭，上屆日本以2比1淘汰荷蘭，不過之後4次交手，荷蘭攞到3勝1負，包括上年喺阿爾加夫盃以6比2狂數對手，呢個盃賽喺女足界係僅次世盃及奧運嘅大型賽事，極具代表性，可以見到荷蘭女足水準進步神速。荷蘭女足2年前以主辦國身份首度捧走女子歐國盃冠軍，當中6戰全勝入13球失3球，嚟到今屆世盃分組賽亦以3戰全勝晉級，表現充滿說服力。效力阿仙奴女足嘅王牌美迪瑪今年只得22歲，但已代表國家隊上陣78次攻入60球，係目前荷蘭國家隊（男、女子隊）入球最高紀錄保持者，配合其阿仙奴隊友雲迪當克及歐國盃金球獎得主馬田絲，絕對係今屆爭標一路奇兵。
上屆亞軍日本喺D組3戰僅得1勝，不但屈居另一支歐洲勁旅英格蘭女足之後以次名出線，面對實力一般嘅阿根廷女足亦被悶和0比0，攻守水準今非昔比，唔排除會再次慘敗喺現時狀態、士氣一流嘅荷蘭腳下，主勝捧得過。
