亞冠盃16強續演日職及中超內訌，廣島三箭返主場再鬥衞冕的鹿島鹿角。雖然三箭只係落後1球，但中場稻垣祥今場要坐波監，連同射手安達臣柏歷腳風欠順，影響攻力，而且主場出擊火力一般，面對為保住優勢會踢守勢波的鹿角，捧2.5球入球細。
（Now672、有線653及613台周二晚6時直播）
首回合三箭以0比1落敗，今返主場為收復失地理應搶攻，可惜首回合末段有中場稻垣祥領紅牌被逐，今場要停賽，實力受削。上季陣中首席射手安達臣柏歷，今季狀態下滑，近期更被貶為後備，除了杜格拉斯韋拉狀態尚可外，其他前鋒如渡大生、拉爾拿亞等入球率欠佳，影響攻力。
三箭今季仲有個弊病，就係主場火力麻麻，近6次主場出擊只入5球，全開2球或以下，差強人意。上屆盟主鹿角，首回合憑沙真奴安東尼奧一箭定江山先拔頭籌，既然有1球領先優勢，客場出擊必定先求穩陣，加上近5次交手，有4次於法定時間開2球或以下，細盤有計。
廣州山東鬥攻撐大盤
至於中超打吡，FC廣州首回合領先FC山東2比1，山東肯定想藉主場之利翻盤（Now 670、有線651及611台周二晚7時30分直播），山東有一個作客入球喺手，今場贏1比0就可以出線，FC廣州當然唔會咁笨束手就擒啦，相反佢哋只要盡快攞個作客入球就可以穩定軍心，作客一樣照攻。翻查紀錄，雙方近7次交手，6次總入球3球或以上，今場捧2.5球入球大啱數。
