沙拿熱夠身嚟料
周三盃賽做主打，阿King重心放喺非國盃A組次輪賽事，東道主埃及硬撼剛果民主共和國。埃及順利旗開得勝，王牌穆罕默德沙拿經過首輪熱身後，預計會逐漸上力；剛果民主共和國為爭出線要焗攻，隨時益晒擅打反擊嘅埃及，讓球盤埃及讓一球，照捧上盤。
（myTV Gold 302及now 639周四凌晨4時直播）
東道主埃及雖然喺首輪壓住對手嚟砌，但只憑馬莫特查斯古特一箭定江山，以1比0小勝津巴布韋，王牌穆罕默德沙拿更連番失機，但阿King覺得沙拿表現唔差，而且對手門將「上晒身」嘅神勇演出，亦成為呢位利物浦前鋒交白卷原因，但經過呢場熱身之後，相信沙拿今仗會嚟料。相反，剛果民主共和國首輪淨吞烏干達兩蛋，尤其係3位外流歐洲嘅魯爾迪瑪、泰沙蘭及馬素阿古，表現差強人意，為出線今仗要焗攻，只會益晒反擊銳利嘅埃及。加上雙方近5次交鋒，埃及取得4勝1和壓倒性優勢，明顯格食格，讓球盤埃及讓一球都冇有怕，上盤捧得過。
烏干達追擊津巴布韋
同組嘅烏干達對津巴布韋，烏干達首輪贏剛果民主共和國2比0，若非前鋒卡杜不斷「嘥料」，應該唔只贏兩粒，亦反映出佢哋上仗佔盡上風。津巴布韋首輪輸畀埃及之役，全程捱打，只輸1粒堅係好彩，不過撞正態勇嘅烏干達難有運行，主勝有計。
（myTV Gold 301及now 638周四凌晨1時直播）
另外，B組次輪賽事，尼日利亞火併畿內亞，「超霸鷹」首輪小勝布隆迪1比0，喺中超搵食嘅箭頭恩哈路後備入替冇耐即建奇功，呢位前屈福特射手近6次為國披甲轟8粒，腳風超順，遇上首輪被弱旅馬達加斯加逼和嘅畿內亞，有力再下一城。
（myTV Gold 301及now 638周三晚10時30分直播）
