A山返晒嚟
美洲盃另一場8強對決，周六早上由哥倫比亞硬撼衞冕嘅智利。以全勝姿態闖入8強嘅哥倫比亞，整體表現依然有待改善，尤其箭頭人物法卡奧至今未開齋，狀態令人擔憂。相反智利喺球星阿歷斯山齊士回勇下，繼續保持美洲盃王者本色，呢場仲有得受讓，當然揀智利讓球客勝。
（Now 650及Now E周六早上7時直播）
力爭連續第3次捧起美洲盃嘅智利，今屆能夠保持强勢表現，同進攻核心阿歷斯山齊士及時回勇有好大關係。「A山」過去一季喺曼聯狀態低迷，仲畀紅魔球迷貼上水貨標籤，不過返到國家隊成個人生猛晒，繼首戰面對日本成功開齋之後，次仗鬥厄瓜多爾一役再射入奠勝球，成為球隊晉級功臣。「A山」之所以能夠脫胎換骨，心態好重要，佢食住止痛藥搏殺，帶動起成隊波。而且要多得智利以佢作為絕對進攻核心嘅戰術安排，令呢位射手可以放開手腳發揮最佳水準，加上中場猛將維達爾上仗輪休抖到足，呢場將以最佳狀態出戰，智利實力不容小覷。
哥倫比亞輸往績讓唔起
哥倫比亞由葡萄牙主帥奎羅斯領軍，防守明顯有改善，分組賽3戰未失過波，不過進攻表現就相對遜色，其中主力前鋒法卡奧踢完3場分組賽都冇波入，狀態成疑，自信心肯定受挫，面對實力更強嘅智利，更難打破入球荒。翻查往績，哥倫比亞近8次鬥智利只係贏過1次，毫無優勢可言，呢場難有本錢讓波，捧讓球客勝好過。
