新攻擊鐵三角拉唔住
美洲國家盃今晚續演8強大戰，委內瑞拉將會挑戰由球王美斯領軍嘅阿根廷。阿根廷上場擊敗卡塔爾取得出線權後，美斯揚言依家先係真正開始，大有一洗頹風嘅決心，不過委內瑞拉近年已非魚腩，既然雙方近5次交鋒4次總入球達3球或以上，波童建議捧2.5球大盤最穩陣。
（Now 650及Now E周六凌晨3時直播）
阿根廷今屆頭2場分組賽鬥哥倫比亞及巴拉圭只得1分，結果要到最後一輪以2比0擊敗卡塔爾，先至攞到8強席位，雖然阿根廷嗰場表現唔算脫胎換骨，不過首次正選拍檔攻堅嘅拿達路馬天尼斯同阿古路各建一功，兩人與美斯組成嘅新進攻鐵三角總算交到功課。美斯賽後揚言呢場勝仗增強咗阿根廷球員嘅比賽信心，同時標示阿根廷嘅美洲盃先真正開始，大有谷底反彈味道，相信今場會沿用上仗贏波陣容力爭晉級。
委內瑞拉升呢唔赦強隊
委內瑞拉近5屆出戰美洲盃有4次成功進身淘汰賽，上屆8強佢哋正正輸畀今場對手阿根廷1比4，不過兩軍之後3次交鋒，委內瑞拉一共攞得1勝2和，包括今年喺熱身賽以3比1擊敗有美斯坐鎮嘅阿根廷，表現大有進步。
委內瑞拉今屆被編與主辦國巴西、秘魯及玻利維亞同組，結果3戰保持不敗得5分以次名晉級，強如巴西喺佢哋身上都攞唔到甜頭，阿根廷實在冇十足把握可以喺法定時間內解決對手。考慮到兩軍過去5次交手合力炮製18個入波，當中4次總入球達3球或以上，今場大細中位數有2.5球，轉捧大盤最好路。
