惡鬥阿爾及利亞唔敢冒進
周五凌晨非國盃C組兩強對撼，塞內加爾惡鬥阿爾及利亞。雙方陣中都有唔少猛人喺歐洲各大豪門搵食，實力比起C組另外兩隊明顯超班，携手出線機會頗大。兩隊過往交手開局都膠着，呢仗半場前都未必分到勝負，半場和係好路。
（myTV Gold 301、Now 638、有線614及654台周五凌晨1時直播）
塞內加爾首戰以2比0雖然擊敗坦桑尼亞取得首勝，但一班前鋒把握力令人失望，多次錯失擴大比數嘅機會，可幸主力攻擊手沙迪奧文尼停賽期滿今仗復出，呢位利物浦前鋒上季踢到曉飛，相信可以改善臨門一腳欠奉嘅問題。值得一提嘅係，塞內加爾中堅沙利夫辛尼上仗因傷半途被換出，呢仗好大機會缺陣，後防難免存在隱患，面對有多位進攻好手壓陣嘅阿爾及利亞，肯定會踢得更謹慎。
和局收場都有着數
阿爾及利亞首戰靠曼城攻擊手馬列斯同前鋒布內亞齊齊開齋，以2比0擊敗肯尼亞，算係正常發揮，不過呢場對住勁旅塞內加爾，預料唔敢冒進。翻查往績，兩隊近5次交手有4次半場同對手打和，呢場比賽初段兩軍都會以試探為主，況且就算和局收場，相信對雙方嚟講都唔係太差嘅結局，寧願留力等末輪再爭3分好過，半場和值得留意。
