增兵勁積極 有備而來
新一季德甲兩周後至開鑼，多蒙特同拜仁慕尼黑今晚會率先喺德國超級盃較量。多蒙特增兵早着先鞭，上季結束後已密密簽人，轉會費支出達1億2,750萬歐元（約11億港元），打破球會史上紀錄；相反拜仁除上季尾已確定加盟嘅盧卡斯靴南迪斯同班捷文柏華特外，喺轉會市場冇大作為，實力同兵源都有所下滑，作客西法倫球場冇本錢讓波，多蒙特受讓平半，黑柴捧下盤。
（Now 671、有線651及612台周日凌晨2時30分直播）
多蒙特今夏瘋狂燒錢，除簽下尼高舒侯斯同祖利安白蘭特兩名現役德國國腳，引入比利時國腳杜根夏薩特，同買斷上季入球效率極高嘅射手柏高艾卡沙外，更成功撬走拜仁老將曉姆斯回巢，此舉除穩定防線外，亦直接削弱爭霸對手實力，難怪連拜仁功勳教頭軒歷基斯都話，唔明拜仁點解肯制。
拜仁轉會優柔寡斷
拜仁「2R」洛賓同列貝利齊齊離隊，成個暑期買人處處碰壁，既優柔寡斷又慳住荷包，多個目標人物好似馬菲斯迪歷特、迪姆華拿同赫臣奧杜爾等都拒絕加盟，近月苦苦追求喺利萊辛尼亦未搞掂，難怪球迷甚至球員都對球會高層嘅辦事效率詐晒型。
兩軍季前熱身賽演出唔曳，多蒙特贏過利物浦；拜仁就擊敗過皇馬同AC米蘭，但相比下拜仁表現較反覆，而且一雙翼鋒基拿比同京士利高文都喺奧迪盃受輕傷，就算上陣狀態亦未必弗，防中查維馬天尼斯更完全冇喺近期熱身賽落場，新援盧卡斯靴南迪斯亦養傷當中。多蒙特雖然都有新援祖利安白蘭特同杜根夏薩特因傷缺陣，但兵源仍在拜仁之上，主場受讓值博。
