老字號招牌吸引名帥猛將
德乙第一輪賽事開打，前晚兩支升班熱門史特加同漢諾威已經率先上演大火併，雙方都有球員被逐，可見列強備戰上晒火，今晚輪到另一支升班熱門漢堡登場，新帥赫基賽前信心十足，揚言可以喺主場擊退實力一般嘅達斯泰特，漢堡讓半一，黑柴撐上盤。
（周日晚7時30分開賽）
達斯泰特財困作客水
漢堡上季喺形勢大好下後勁不繼，無緣升上德甲，主因係球會喺季中已講明將會縮皮，一眾高薪戰將都冇得留低，搞到士氣受損影響成績。今季亦擺到明慳住搞，早早放棄菲臘高斯迪、拉蘇加同賀治比等大牌球員，但基於球會老字號招牌，搵到大批甚具戰鬥力猛將加盟，包括上季波琴首席射手軒達斯亞、上季恩高斯達特首席射手桑尼傑圖、基爾中場硬漢堅森比，仲向紐倫堡挖走主力守將艾華頓荷西同利保特，整體人腳反而更有睇頭。
漢堡搵兵有計，搵教練更有運，得到曾帶領禾夫斯堡同慕遜加柏取得佳績嘅赫基出山，合約只簽一季，列明必須升到班至會續約，不過赫基就對自己同球隊前途信心十足，好滿意組軍同備戰工作，有信心今晚主場出擊可以旗開得勝。
對手達斯泰特仲窮過漢堡，近季戰績每況愈下，季前組軍亦賣多買少，佢哋係上季德乙作客成績第二差球隊，季前熱身賽表現亦唔起眼，今晚作客遇上質高一皮嘅漢堡難睇好。
