周日凌晨阿甲激戰連場，又係時候由阿King畀過關貼士。其中沙士菲對紐維爾舊生，沙士菲雖然開咧3戰未贏過，不過鋒力其實唔弱，加上舊生新兵艾拔坦高腳風幾順，兩隊鬥攻格，入球大咪走雞。
（周日凌晨2時30分開賽）
今季繼續由前曼聯鐵衞軒斯掛帥嘅沙士菲，開咧3仗取1和2負戰績慘淡，尤其後防疲弱場場有失波，包括上仗1比3不敵拉魯斯。不過，球隊進攻表現其實唔曳，早前就曾經2比2逼和衛冕嘅競賽會，呢場料會照辦煮碗以攻代守。加上舊生新加盟嘅前鋒艾拔坦高，已經連續2場有波入，腳風奇順，有佢搭住前馬德里體育會猛將麥斯美洛迪古斯，舊生有足夠球火力同沙士菲鬥攻，一於捧入球大。
串獨立隊大費城聯勝
另外周日早餐波，獨立隊主場硬撼高隆，高隆射手威爾遜摩尼路今季加盟之後，近2仗入3球弗到漏，計埋早前南球盃8強次回合4比0反勝蘇利亞成功晉級，球隊近2仗全開3球或以上，呢場面對强敵獨立隊隨時再演入球騷，入球大唔好錯過。（周日早上7時開賽）最後有美職費城聯主場鬥華盛頓聯隊，出名火爆嘅華軍球星朗尼又嚟料，上仗因襲擊對手直接紅牌被逐，呢場唔使預佢，華盛頓聯隊難同主場強勢嘅費城聯搶分，捧費城聯上盤。
（MyTV Gold 301台、Now 638、有線614及654台周日早上7時30分直播）
