周六凌晨有场重量级热身赛，两大南美劲旅巴西、阿根廷于中立场沙特阿拉伯拍跳。阿根廷今次重召两大王牌美斯及阿古路，不过两人同一班新血未夹惯，未必可即时发挥最大作用；巴西攞完美洲国家盃后「懒懒闲」，连续4场热身赛未赢过，考虑到两军近年交手通常少入波，今场捧2.5球细最好路。
（周六凌晨1时开赛）
阿根廷喺今夏美洲国家盃攞完季军后踢咗4场热身赛，全部冇用美斯、阿古路、迪马利亚等旧将，反而攞到2胜2和唔错成绩，证明拿达路马天尼斯、卢施素、里安度柏利迪斯等新世代有料到，假以时日不难成为国家队骨干，今次主帅史卡朗尼重召美斯、阿古路两大王牌，正好畀个机会呢班后生仔「偷师」，吸收国际赛经验。不过史卡朗尼对上4场热身赛用尽方法希望摆脱「美斯倚赖症」，今次搵番美斯入伍真係唔知好事定坏事。
巴西战意低兼冇尼马
巴西喺今个夏天以东道主身份赢得美洲国家盃，4强正正就係击败今场对手阿根廷，与上次交手相比，巴西今场继续冇养紧伤嘅尼马，而且艾华顿索拉斯、费兰甸奴同丹尼尔都相继落选，反而皇马新贵洛迪高高斯、阿士东维拉孖宝韦斯利摩拉斯及杜格拉斯雷斯、贝迪斯守将艾马臣艾巴里斯杜都首度获徵召，试阵意图非常明显；巴西对上4场热身赛对哥伦比亚、秘鲁、塞内加尔及尼日利亚呢啲「一线尾、二线头」球队，成绩只得3和1负，友赛战意唔算高，今场亦不宜过分睇好。
睇番双方近6次交手，巴西攞到4胜1和1负略佔上风，不过当中有5次总入球都唔超过2球，足证两队已经熟晒路，胜负可能只係一球上落，今场大细中位数有2.5球，波童建议捧细。
