今晚欧国外「死亡C组」上演关键战，「3哥」北爱尔兰主场硬撼「1哥」荷兰。北爱尔兰今届头威头势，全因之前未遇强手，近2轮撞正传统劲旅德国及荷兰即跪低，今返主场再斗客场特醒、赢波即出线嘅荷兰，相信都冇运行，荷兰让一球照捧上盘。
（有线662及602周日凌晨3:45直播）
北爱尔兰于C组头4轮赢晒，睇落好醒，但赢嘅对手只係爱沙尼亚及白俄罗斯之流，近2场面对劲旅德国及荷兰即全败，尤其係上轮作客对住「橙军」，喺75分钟先开纪录，点知末段连失3球倒输1比3，明显係欺善怕恶，出线形势急转直下。但喺呢个关键时刻，北爱领队米高奥尼尔日前却接受英冠史笃城嘅邀请担任教头，依家兼任两军的主帅，难免影响军心。
荷兰坐拥迪比、赖恩巴布、法兰基迪庄等进攻好手，火力强劲，而喺利物浦专职防守嘅韦拿杜姆，喺领队朗奴高文麾下，将抑压多时嘅进攻本能全面释放，今届欧国外已有5球进帐，真係估佢唔到。
韦拿杜姆释放进攻潜能
荷兰依家德国同得15分，领先北爱3分，今场只要赢波就笃定出线，就算和波收场，若果另一边厢德国击败白俄罗斯，「橙衣兵团」亦可凭较佳对赛成绩力压北爱晋级，变相令北爱今场唔赢唔得。可惜北爱遇强即屈，面对今届欧国外3场客战赢晒嘅荷兰，焗攻下盏输多两钱重，荷兰让一球都冇有怕，上盘捧得过。
