今晚英超压轴好戏，必属榜首大战──「1哥」利物浦主场迎战「2哥」曼城，名副其实係冠军前哨战。不过今仗盘口有啲奇怪，气势如虹嘅利物浦竟然唔使让波，只係开平手盘实在太笋，呢类俗称为鬼盘，有请君入瓮引你买「红军」之嫌，不过我就一于少理，何解呢？
首先，利物浦嘅晏菲路主场威力强劲，单计今季5场主场联赛赢晒，而且近7次喺晏菲路迎战曼城亦豪取6胜1和，再者「蓝月亮」上次造访此地赢波，已经係2003年嘅事，要破咒绝非易事。其次係曼城中后场伤兵满营，上季能在联赛反超利物浦夺冠，全靠主场赢2比1之役，当时两位中坚拿朴迪及高柏尼，一个受伤，另一个已离队，难怪今季防线表现腾腾震，甚至门将仲要用到久疏战阵嘅哥迪奥巴禾，但依家落后6分，焗攻随时暴露更多破绽。
最后係「红军」班主约翰亨利，佢旗下除咗利物浦之外，仲有美职棒球队波士顿红袜。不过后者战绩欠佳，约翰亨利唔单止冇打算添兵，仲考虑减磅，另一边厢，佢就向「红军」高层及主帅高普大派定心丸，称若果需要加强阵容，或未能放甩曼城的话，可放胆于冬季转会窗大洒金钱买人。截然不同嘅态度，反映出佢同「红军」球迷一样，对从未攞过嘅英超冠军趋之若鹜。正正係上述3大条件，令我觉得毋须理会鬼盘，全力撑主场嘅「红军」坐和望赢。
