主场砌曼城数据赢晒
今晚英超爆发榜首大战，利物浦主场对曼城。「红军」联赛主场已超过两年半未输过，加上多年来晏菲路都食住「蓝月亮」，今场开平手盘真係有啲笋过龙。当然曼城非善类，盘口向来恶，唔使过分担心有「鬼」，乐比今场撑利物浦。
（Now 621周一凌晨零时30分直播）
利物浦对上一次联赛主场输波，已经要追溯到大前季，即2017年4月，之后两年半保持28场不败，而且近20场仲要赢咗19场，数据之强绝对唔係运气使然，而係真材实料。
4超强数据撑红军
同埋曼城作客晏菲路嘅数据实在太差，近16次到访未赢过，仅得5和11负劣绩，高普亦可以话係哥迪奥拿嘅剋星，哥帅职业生涯输过7次畀高普，係输得最多次数嘅领队，加上利物浦近年喺Big6对决嘅主场战绩辉煌，22次主场出击只係输过1场，拥有以上4个超强数据，今场捧利物浦可谓理所当然。
事实上，利物浦季初表现可谓极其平稳，11战10胜1和，唯一失分係作客对曼联，该仗「红军」踢法偏向保守，毕竟榜首有一定优势，但今仗主场出击预计高普会进取少少，况且上周中欧联对亨克一仗，沙迪奥文尼同罗拔图法明奴都担任后备，摆到明留力今仗。
蓝月亮有后顾之忧
另一边厢「蓝月亮」曼城今季表现较为飘忽，主场输畀狼队同作客不敌诺域治都令人意外，最令人担心係巴西钢门艾达臣摩拉斯今仗因伤缺阵，要由后备门将哥迪奥巴禾顶上，不过巴禾啱啱场欧联后备入替却领红牌被逐，搞到要队友基尔获加客串门将，随时影响今场把关嘅信心。
