今晚欧霸G组格拉斯哥流浪主场迎战波图。「格流」主帅谢拉特教波有板有眼，令呢只沉睡多时嘅苏超雄狮甦醒，今季主场只曾输过畀些路迪，对住波图亦冇有怕，平手盘度士撑主队！
（Now 645、有线662及602台周五凌晨4时直播）
昔日英格兰球坛「一时瑜亮」嘅林柏特同谢拉特，教波后同样获得好口碑，「林伯」带领旧东家车仔打出青春火花，谢拉特就喺苏格兰储吓「经验值」，为有朝一日重返母会「红军」打好基础。
近12场欧霸主场未输过
好多人话中场出身嘅球员更适合担任主帅，因为佢哋要睇通全局嘅视野，瞻前顾后，有利日后成为教头做出正确决定，作为过来人嘅度士非常认同。事实上谢拉特自上季接手「格流」后，喺有限资源下令呢间「百年老店」重上正轨，今季于联赛同死敌些路迪平起平坐，唔讲得笑。
单计欧霸，「格流」喺G组与波图同得4分，落后年青人2分，亦只领先包尾飞燕诺1分，稍有闪失随时出局。虽然波图有番咁上下，但「格流」喺谢帅执教后，近12场欧霸主场获9胜3和，今仗开平手盘咁笋，主队值捧。
