欧联今周嚟到第4轮赛事，好多球队已掌握出线主动权，其中1支係C组嘅英超劲旅曼城，佢哋今晚作客再斗阿特兰大，只要赢波即锁定出线资格，战意唔使怀疑，赢波机会高唱入云。
（有线662及602台周四凌晨4时直播）
自2008年阿联酋富豪文梳亚入主后，曼城有大水喉射住之下不断壮大，从只识不断赢波嘅暴发户，经名帅哥迪奥拿雕琢后，升呢至踢法优雅嘅豪门，哥帅领军「蓝月亮」嘅125场赛事中，豪取95胜16和仅14负，狂轰315球，上季横扫国内4项锦标，在英格兰球坛嘅统治力拍得住昔日嘅曼联。不过曼城喺欧联嘅最佳成绩只係4强，而且于哥帅麾下更连续3届连4强都不入，作为豪门实在唔合格，因此今届会集中火力攻欧联，难怪季初联赛表现略有起伏。
阿特兰大要交学费
虽然阿特兰大係意甲前列分子，但喺欧联只属初哥，主帅加斯柏连尼更係「进攻狂徒」，2011年季初畀国米炒鱿、最落难嘅时刻，获当时执教巴塞嘅哥帅邀请观操，不过要踢到像曼城般行云流水嘅进攻，绝不容易，2周前佢哋造访「蓝月亮」反输1比5，有办你睇，何况近5仗赢得1场咁大把，状态麻麻，坚持斗攻犹如自杀，相信曼城今仗可赢波提早晋级。
