Peter经常告诉大家，球场係英雄地，哪怕球队表现唔错，但差点运气而仅败或失分，主帅都难逃被炒厄运。英文有句说话：「What have you done for me lately?」意思係你最近为我做过乜嘢，若果近期你为我赢波或捧盃，当然冇所谓喇，之前5季普捷天奴喺有限资源下，领导热刺稳定地重返劲旅行列，成为英超Big 6之一，证明呢位阿根廷人係有料到。
不过热刺有位「铁算盘」主席利维，任何涉及金钱、买卖球员等都严格管理，只管球场内事情嘅「肥普」係冇权过问，就算上季保住前4兼杀入欧联决赛，可惜欠缺夺冠嘅命水，呢个係致命伤。
终极目标引富商收购
喺「生意人」利维眼中，一直都想「做靓盘数」，建新球场、用冠军战绩等吸引富商收购，上季冇买人都有唔错战绩，今夏增添尼当比利等新兵，竟然出闸脱脚，无可避免要换帅。利维恨捧盃就要搵个有「冠军命」嘅主帅，适逢着名以色列经纪沙哈维「穿针引线」，协助呢支北伦敦球队喺11小时内，极速完成炒「肥普」签「寸王」嘅易帅行动，今晚作客韦斯咸，以摩连奴嘅功力起码唔输。至于榜首利物浦作客水晶宫，红军有沙拿同安德鲁罗拔臣缺阵，唔係赢硬，尾场「Big 6大战」曼城防线伤兵多，主场对车路士预期会係精彩对决，但不宜高估。
