德甲独脚戏法兰克福主场对哈化柏林，哈化上轮虽仅负劲旅多蒙特，但无损魅力主帅奇连士文心情，佢认为球员已经畀咗积极回应，上仗遇强未能追和唔紧要，今场可以追番，作客面对同样求胜心切嘅法兰克福，黑柴推介中位数3.5球大盘。
（Now 670、FOX+、有线651及611台周六凌晨3时30分直播）
哈化上轮赛前炒咗克罗地亚教头高域，搵咗阔别德甲10年，今年至加入哈化监事会嘅奇连士文复出接掌帅印，佢上任首战喺主场斗多蒙特，得到球迷同传媒嘅热烈欢迎，球员喺场上亦付出更大努力奔跑以作回应，虽然结果哈化仍然技逊一筹输1比2，搞到喺德甲4连败，排名跌到尾三，但「奇哥」对球员态度相当满意，今仗佢将阵式由442调整为352，要求更强进攻，前线用卢克巴基奥同戴菲沙尔基两位高速球员打反击，有信心喺法兰克福争取入波。
主队法兰克福火力劲
法兰克福近期分心欧霸，导致德甲3连败，但连仗输波多少因为人少打人多同欠运，而且攻击主力鎌田大地、柏辛斯亚同巴斯杜斯都有货交，尤其前者已经成为球队进攻核心，今晚主场当然会抢攻，不过守将阿巴谦同杜明历克哥亚停赛，料难保不失，何况两军首席门将奇云查普同查斯甸今仗分别因为养伤同坐波监缺阵，有利双方争取入球。
