唔赦Big 6最叻稳守突击
今晚英超上演曼市打吡，曼城主场迎战曼联。曼联今季继续唔争气，但每逢「打大佬」表现出奇地好，Big 6战未尝一败，适逢曼城防线走样，曼联受让球半/两球捧得过。
（Now 621及611周日凌晨1时30分直播）
曼联目前仅排第6位，落后榜首利物浦22分之多，领队苏斯克查帅位危在旦夕，好彩佢今季领军对亲强队都有交代，联赛加盃赛Big 6嗰5战共取得3胜2和佳绩，以其一贯稳守突击泊大巴战术，今仗对曼城唔係话完全冇得打。
曼城防守走样让唔起
事实上，「红魔」今季重用一班新秀打江山，经验係输蚀，亦冇强攻对手本钱，但嗰种快速反击打法对强队係有一定效果。「福仔」拉舒福特近9仗为曼联上阵射入10球，直头要颁个奖畀佢，周中对热刺全靠佢梅开二度先全取3分。
反观「蓝月亮」曼城今季表现明显较上季跌Watt，目前落后利物浦11分，连领队哥迪奥拿都长他人志气，话争标机会渺茫，以往佢哋稳定性好高，对弱队永远十拿九稳，点知今季对诺域治、纽卡素先后失手，防守明显出现漏洞。
睇番曼城上季全季联赛只係失咗23球，但今季联赛踢咗一半未够已失咗17球，其中费兰甸奴移后打中坚，由根度简踢中场，好多人都认为效果唔理想，今场随时又畀「福仔」偷袭得手，让到球半/两球实在太辣，宁敲遇强愈强嘅曼联下盘。
