周二凌晨英超独脚戏，水晶宫主场同白礼顿上演中游对决。两支球队近期都有超水準发挥，其中水晶宫靠出色防守取胜，绝对唔容易攻破，至于白礼顿连续喺强敌身上抢到分，士气都有返咁上下，唔会想一开波就落后，捧返半场和好过。
（Now 621周二凌晨3时45分直播）
老帅鹤臣带领嘅水晶宫，近3场联赛靠坚挺嘅后防表现，取得2胜1和好成绩，3场波1球都冇失过，防线做到滴水不漏，加利卡希尔等守将绝对抵讚。查实水晶宫经历10月尾至11月地狱赛程后，近期状态已经回复，多得防守端交足功课，呢支伦敦球队近6场5次半场同对手打和，开局非常硬净。相比之下，水晶宫进攻能力失色得多，联赛至今只得14球，係英超攻力第2差嘅球队，头号球星韦费特沙夏虽然依然好扭得，可惜个人今季入得2球，入球效率大减，难免影响到球队整体进攻发挥。
白礼顿近期同样争气，早前同球队续约嘅领队朴达，近两仗率领「海鸥」面对阿仙奴同狼队两大劲敌共抢到4分，踢出士气波。当弗攻击手艾朗干洛尼有伤上阵成疑，冇咗爱尔兰前锋压阵，呢场作客嘅白礼顿开局应该都会做好防守先，下半场再伺机反击，半场和係心水之选。
