虽然今季英超开始增设歇冬期，但喺圣诞、新年嘅频密赛程依然冇变，照旧由今轮、拆礼物日、年尾至元旦上演快车，这样何来歇冬呢？有别于其他欧洲联赛喺圣诞及新年执行，英超係去到2月先歇冬，到时将其中1轮赛事拆开两周嚟踢，每周只踢5场，变相令每支球队有约两周休息，英足盃第5圈则顺延至3月举行，并不设重赛。
言归正传，英超「1哥」利物浦今轮联赛轮空，远赴亚洲出战世冠盃，并喺上周中击败蒙特雷杀入决赛，今晚会硬撼法林明高，再演欧洲对南美嘅最强对决。
儘管红军上仗对蒙特雷，要去到末段入波先险胜2比1，但展现出赢家本色，当然法林明高亦非善男信女，倘若红军捧走世冠盃，又顺利蝉联今届欧联锦标，加上我认为佢哋笃定夺得今季英超冠军（只係时间问题），咁就可以囊括三大锦标（洲际、欧洲及英超）。就算今晚不幸败阵，我相信红军班主同球迷亦唔会太失望，因为佢哋最期望嘅，仍然係再尝30年来首捧英格兰顶级联赛冠军嘅滋味。
