主场不败华Dee弗爆
拆礼物日最佳节目，当然係睇英超。今晚压轴战上演榜首大战，由「2哥」李斯特城主场对利物浦。利物浦目前打少1场有10分优势，即使未算坐定粒六，首个英超冠军都指日可待，不过佢哋刚踢完世冠盃游完飞机河，嚟紧又要应付快车赛程，条数高普自然识计，今场战术上肯定比较保守，就算和波都收货，利物浦让平半，乐比撑下盘。
（Now 621周五凌晨4时直播）
虽然英超球季只係踢咗接近一半，不过你问10个球迷，9个半都会话英超冠军係属于利物浦，即使佢哋已经攞咗世冠盃、欧超盃甚至上届欧联，但对利迷嚟讲，所有冠军都唔及英超冠军嚟得有意义，除咗因为利物浦已29年未攞过顶级联赛冠军，更因为近年多次与冠军擦身而过，对佢哋嚟讲英超冠军比任何锦标都更珍贵。
吸收过上季嘅教训，高普今季战术上更谨慎同埋懂得留放之道，例如世冠盃4强对蒙特雷都留有一手，未派最强阵容出战，不过决赛对法林明高踢足120分钟，加上要舟车劳顿，难免令球员疲累，而球队目前有阿历士张伯伦、祖尔麦迪比、法宾奴泰华利斯及洛夫云等伤兵，高帅有需要好好保护球员，以免再用佐敦轩达臣客串踢中坚，佢亦深明今场最紧要保持不败，保持住绝对优势踏入2020年。
另一边厢李斯特城今季成绩好完全唔係侥倖，即使上仗不敌曼城1比3，但已证明佢哋有能力同任何对手周旋，除「华Dee」占美华迪继续入球停不了，今季联赛已射入17球外，其他主力如尼迪迪、占士麦迪臣及苏恩古都有极佳演出，李城今季喺联赛主场保持7胜2和不败佳绩，利物浦要作客赢波唔係咁易。
罗渣士领军倒戈有计
事实上，李城主帅罗渣士始终执教过利物浦一段时间，对红军内外都相当熟悉，况且佢过往3次对利物浦，取得1胜1和1负成绩，当中包括首循环输1比2，其实嗰场波李城都输得相当唔抵，只係补时阶段输球12码，今次返主场绝对有能力复仇成功。
