当欧洲各大联赛都进入歇冬阶段时，我哋一班讲波佬能有专栏写、要做球赛评述，真係归功于英超有圣诞新年快车，赛程超频密，球迷梗係开心喇，但对球员体能係一大考验，难怪英超两大名帅高普同摩连奴，都不约而同话拆礼物日比赛唔係罪，但只得一日休息，跟住即刻再上阵，实在係吃不消。
经过Boxing Day激战，相信好多英超领队翌日都唔会叫有份上阵嘅球员狂操，最多让佢哋轻鬆操练，或做一些有关恢复性嘅物理治疗及按摩等，甚至索性放假，迎接三日内第二场硬仗。尤其係对部分限米煮限饭嘅球队而言，如何喺呢个快车档期作出适当轮换，非常重要，君不见早前气势如虹嘅李斯特城，喺近3仗联赛未尝胜果嘛！
利物浦成功在轮换得宜
相反，「1哥」利物浦纵然之前要赴卡塔尔兼顾世冠盃，幸好主帅高普轮换得宜，令上阵球员总係活力十足，呢个亦离唔开佢哋有足够嘅板櫈深度，而且行运行到落脚趾尾，乘住劲敌李城、曼城接连失分，依家甩开成条街，一般球评家讲红军夺冠机会高唱入云，同我一早讲定佢哋笃定夺冠相比，已算係明哲保身。讲番今晚英超，阿仙奴对车路士、利物浦对狼队及曼城对锡菲联，亦颇具睇头，阿仙奴新帅阿迪达上任冇耐，梗係唔想喺伦敦打吡输波，而利物浦领先优势明显，唔排除迎战狼队会派出部分副选应战，曼城后防不稳，遇上锡菲联犹如瓷器撞缸瓦，失分唔奇，不妨博大雾小吼和波3串4，攞番个2019年尾彩。
