元旦日英超有好戏码，阿仙奴主场对曼联。「兵工厂」自阿迪达接手后仍未开斋，上仗临尾香被车仔反胜，除再次暴露防线问题外，士气亦大受打击，噩运由2019年带到落2020年，今仗面对「Big 6王」曼联随时再出丑，平手盘乐比撑曼联及2.5/3球大盘。
（Now 621周四凌晨4时直播）
2020年首次同大家见面，乐比喺度讲声新年快乐先，回想起乐比首次喺《东方波经》同各位交流，不经不觉已经係20年前，小弟由乐比仔变成大叔一名，阿仙奴亦由昔日嘅班霸变成中下游球队。喺足球博彩世界入面，印证咗「变幻才是永恒」呢个道理，即使乐比已写过数十次阿仙奴对曼联嘅预告，但每次对赛都係场独立赛事，每一分钟都瞬息万变，一日未收盘，仍然可以下注。
就好似上仗阿仙奴对车路士咁，阿仙奴上半场佔尽优势，但林柏特两个果断嘅调动，令阿仙奴最后10分钟连失两球，当然你可以话车仔反胜存在运气，不过所谓嘅运气正係由好多细微嘅部分组成，例如阿仙奴门将宾特尼奴送大礼唔係第一次，防线上嘅甩漏係咪冇得救？点解球队永远伤兵都多过人？相信好多球迷都同乐比一样充满问号。
阿仙奴目前最大问题来自防线，全无执教一队经验嘅阿迪达师承哥迪奥拿，进攻上或者有一手，但处理防线问题肯定属初哥，而且哥帅嗰套必须要由最顶尖嘅球员演绎，睇番阿仙奴依家手牌真係搵着阿迪达嚟搞，何况哥迪奥拿嘅战术体系係需要长时间浸淫出嚟，阿仙奴董事局同球迷究竟对阿迪达有冇足够耐性？阿仙奴另一危机係输到冇晒信心，近15场波只係赢过1场，初哥阿迪达能否压得住场实在令人怀疑。
红魔打突击遇强愈强
曼联今季Big 6大战6场未输过，强如利物浦首循环唯一失分赛事就係同曼联打和，可见红魔鬼嘅突击踢法係几奏效，前线快攻部队安东尼马迪尔、拉舒福特同格连活特虽然看似冇乜章法，但就正正係冇路捉，面对强敌时经常突袭得手。阿仙奴防线四处都係缺口，依家连哥林张伯斯都伤埋，焗住要用梅斯达菲、大衞雷斯，只能够讲一句自求多福。
