「半个主场」气势赢晒
喺泰国举行嘅U23亚洲盃，今日进行D组次轮赛事，其中约旦U23硬撼越南U23。越南近年足球水準不断提升，上届获得亚军有办你睇，今届誓要捲土重来，首轮意外打和，今轮不容再失，客胜有计。
(Now 670、有线651及611台周一晚9时15分直播)
越南足球水準近年一日千里，在上届U23亚洲盃爆冷杀入决赛，喺雪战中加时输畀乌兹别克，屈居亚军虽败不辱，更弹出「越南美斯」阮公凤等新星。越南今届梗係想乘势威番次，顺便争取东京奥运入场券，上届成员阮光海仍在阵中，儘管首轮只能打和阿联酋0比0，同对手表现抢缰、自己未上力有关，而且泰国有好多越南球迷，犹如半个主场，未踢先赢气势。
约旦首轮出战北韩，但佢哋喺领先两球之下，忽然走晒样畀北韩围攻追番粒，若非完场前对手无人看管下近门1码竟然顶中柱唔入，随时和波收场，亦反映出佢哋受压时踢到进退失据嘅情况，今遇实力更强、矢志争胜嘅越南，凶多吉少，简简单单捧越南客胜开斋。
北韩走晒样难敌阿联酋
早啲开波嘅同组赛事，阿联酋U23对北韩U23。阿联酋首轮赛和越南，演出不俗，从一开波到完场都快速行军，令越南打唔出水準，未能入波有啲唔抵。北韩近年整体水準呈现下滑，首轮不敌约旦初段犹如发梦，直至落后两粒先至醒，最终输1比2，质素麻麻，宁捧主胜。
(Now 670、有线651及611台周一晚6时15分直播)
