近5主战加柏换边后至决胜
经过接近4周歇冬期，德甲今晚展开次循环赛事，排名第5位嘅史浩克04挑战2哥慕逊加柏，两军歇冬期同样拉队到西班牙集训，整体实力同状态接近，今季至加盟领军嘅双方新帅大衞华拿同马高路斯表现同样令人满意，今场係五五波，史浩克近5次主场对慕逊全部要换边后至分胜负，黑柴推介有2.16倍嘅半场和。（Now 670、Fox +及有线651、611台周六凌晨3时30分直播）
史浩克新帅作风保守
两军喺歇冬期都借出部分副选球员畀友会，慕逊加柏本身兵源充足，并冇补充球员，相反史浩克增兵就比较积极，佢哋向奥格斯堡借得扭计求转会嘅奥地利高大前锋基哥列舒治，丰富咗本身有限嘅进攻板斧，基于防线仲有主力韦斯顿麦坚尼、史谭保利同沙利夫辛尼养伤，佢哋喺赛前两日借得巴塞隆拿守将图迪保顶档，不过呢位法国小将未能赶及披甲，好在中坚拿斯达锡伤愈复出，防线仲勉强够人用。
史浩克今季主场除首轮不敌拜仁外，已保持8轮不败，但近6轮有4次和波，加上近6次同慕逊加柏交手4和2负未赢过，作风稳健嘅新帅大衞华拿唔会急于抢攻，已决定季尾约满转投拜仁嘅门将纽布尔今场要停赛，但会方已决定栽培舒晓拔顶替佢，相信影响唔大。
慕逊加柏上半季攞到第2名，新帅马高路斯都表示满意，球队歇冬期备战同拍跳都好积极，今仗除左闸宾斯拜尼养伤外可以夫添出击，只係佢哋作客向来飘忽，近5场德甲作客输咗3场，相信歇冬后首战遇上旗鼓相当嘅对手亦唔会太冒险，半场和有不俗分头可以一试。
