夏兰特效应
周末德甲焦点集中喺多蒙特作客奥格斯堡之战，皆因成个歇冬期最爆嘅转会新闻，就係挪威金童艾宁夏兰特选择加盟「蜜蜂兵团」，呢个决定除咗令一众豪门失望之外，仲惹起德甲球坛热话，奥格斯堡教头马田舒密特就话会热情招待呢位全球炙手可热嘅新星，要佢有个不愉快嘅德甲处子战，今晚誓倾力同多蒙特拣过，两军都攻强守弱，黑柴推介中位数3.5球大盘。
（Now 672、FOX+、有线653及613台周六晚10时30分直播）
主队教练扬言好好招呼
艾宁夏兰特喺欧联嘅超卓表现全球瞩目，马田舒密特都话为佢倾倒，仲话佢选择嚟德甲令好多球坛人士期待，难得呢位新星首战就由奥格斯堡接待，佢哋点都唔会怠慢，一定会尽地主之谊，话畀夏兰特听德甲唔係佢想像中咁易应付，而且奥格斯堡亦要为首循环畀多蒙特大炒5比1作出回应。马田舒密特之所以咁有把炮，皆因奥格斯堡喺佢调教下的确进步神速，主场已经3连胜共入9球，箭头尼达列治拿踢出人生最卓越嘅球季，至今已经交出8个入球同9个助攻，难怪马田舒密特咁有信心向多蒙特叫板。
多蒙特经过上半季动荡演出后，目前已落后榜首RB莱比锡7分，体育总监佐尔克话明球队目标只有冠军，次循环场场都要当决赛踢，对今场3分志在必得，经过歇冬期后球队伤兵情况大有改善，可以上足子弹同奥堡驳火，焦点新星夏兰特虽因备战时间不足，今仗好大可能先任后备，但领队法夫尔基本上肯定会喺适当时间派佢上阵，呢场可观嘅入球骚，大家又点可以错过呢！
