利物浦留手曼联死守
今晚英超双雄会，利物浦主场迎战曼联。红军踏入2020年继续保持强势，抛离曼城达14分兼少踢一场，首夺英超冠军只係时间问题，不过曼联係今季唯一令利物浦失分嘅球队，踢硬仗又分外醒神，乐比预期今仗大部分时间会处于胶着状态，首选係2.5/3球嘅细盘。
（now 621周一凌晨零时30分直播）
高普近期战术以稳行先，最紧要係袋3分，尽快确立联赛优势，再喺季尾搏欧联，尤其係下月欧联重开，利物浦要硬撼马体会，高普自然留一手，唔希望喺呢段时间有乜损伤，近4仗有3仗係小胜1比0，但要讚红军嘅防守做得相当好，已连续6场不失球。
踢埋今场之后，利物浦将要应付连续4场嘅作客赛事，高普坦言曼联唔易应付，尤其係曼联嘅战术相当注重防守，但事实证明呢招对强队係奏效，因为「红魔」今季对前4球队利物浦、曼城、李斯特城及车路士都保持不败。
首循环1比1埋门唔多
曼联入波始终集中喺三人身上，近15个英超入波，都係由拉舒福特、安东尼马迪尔及格连活特包办，主要靠快速反击，相信红军今场都会好好招呼佢哋，防线唔会压得太上。
首循环交锋时，曼联嘅压逼性嘅踢法令利物浦吃尽苦头，基本上鲜有空间同时间组织攻势，两队埋门机会甚少，加埋只有6次射中龙，甚至连角球加埋都係得4只，可见大部分时间都係中场混战居多，个波甚少去到危险位置，最后踢成1比1已算双方都把握到机会，今场主客互调，战局都未必差太远，一于再追细盘。
