争踢欧联丧攻代守
英超早场爆发欧联入场券保衞战，「3哥」李斯特城迎战第4位嘅车路士。车仔近期联赛频频失分，为巩固前4位置，作客都冇得拣，一样要丧攻，李斯特城近况稍稍回落，近7场联赛有6场都有失波，呢7场全部总入球都係3球或以上，今场随时合演入球骚，捧中位数2.5球入球大。（Now 621及611周六晚8时30分直播）
车路士上仗于伦敦打吡面对死敌阿仙奴，喺一度领先兼大部分时间打多一人的情况下，最终依然两度失守赛和2比2，继早前0比1爆冷不敌纽卡素后再次失分，表现令人失望，2场失5分，依家只领先曼联、热刺及狼队6分，嚟紧2月欧联重开前，车仔要面对死亡赛程，呢场对「狐狸」之后，跟住要斗曼联同热刺，再唔抢定啲分喺袋，就会好大镬。
事实上，车仔今季喺林柏特带领下明显攻强守弱，近6场只得1次保持清白身，幸车仔今季联赛入41球嘅纪录，乃英超前3外火力最强球队，相信「林伯」会继续以进攻去弥补后防不足。
李城华Dee尼迪迪复出
圣诞快车期前气势如虹嘅「狐狸」，近期先后受到射手占美华迪及中场屏障尼迪迪轮流因伤缺阵影响，失咗唔少分，由次席跌到落第3。幸2人已经伤愈，李城进攻嘅锐利程度未见减弱，伊恩拿祖成功喺占美华迪养伤期间担起入球重责，现时华Dee复出，攻力再添信心，加上占士麦迪臣组织能力上乘，带动李城近7场联赛全开3球或以上，今场面对火力同样嘅车路士，2.5球入球大稳开。
