评级调低 翻盘良机
年初九英超有好戏码，由热刺主场对曼城。乐比先同大家拜年，祝各位读者身体健康，新一年赢多啲。热刺自摩连奴接掌后，经过短暂嘅蜜月期，好快就陷入低潮，如果计盘路已经10场未赢过，庄家亦不断调低对佢哋嘅评级，今仗主场对曼城竟有受让一球嘅笋盘，乐比认为下盘绝对係捞货之时。（Now 621周一凌晨零时30分直播）
若论今季英超输盘之王，非阿仙奴同热刺莫属，阿仙奴联赛赢盘率仅得25%，热刺稍为好少少有29%，两支名牌队多捧场客支持，但又成日让过龙，难怪成为名牌毒药。不过呢个世界所有嘢都係物极必反，当热刺愈输得多，盘口自然愈嚟愈吸引，去到临界点就係佢哋翻盘之时。
摩连奴泊大巴最拿手
事实上，热刺同曼城两队季初交手之时，当时曼城有主场之利都係让一球、球半，结果打成2比2平手，今仗作客让一球真係过咗火，虽然热刺转会窗期间失去咗基斯甸艾历臣，哈利卡尼亦复出无期，但总算补充番贝云积同埋谢特臣费南迪斯，何况喺摩连奴麾下从来唔需要巨星，而係需要一班为佢卖命嘅战士，打硬仗、泊大巴正正係摩连奴嘅拿手好戏。
曼城今季表现明显唔及上季，主要係失球数字大幅上升，球季未到三分二，失球数字早已超越上季，防线球员亦轮流受伤，经常出现人手不足嘅情况，目前班捷文文迪及费兰甸奴仍然有伤在身，拿朴迪上阵机会则係一半一半，若未能夫添出战，势必对曼城防线演出构成影响。
曼城目前被榜首嘅利物浦抛离19分，领先第5位嘅曼联又有17分之多，欧联入场券稳阵之余争标又无望，肯定会将集中力放喺盃赛身上，当中包括今个月对皇马嘅欧联重头戏，联赛失分对佢哋嚟讲唔係咩重大损失，战意上未必及得上全力争前4嘅热刺，既然曼城今场要赢两球先赢盘，梗係宁捧主场斗志鲜明嘅热刺啦。
