新年流流，大家少不免会讲些吉利嘅说话，例如祝你风生水起、人逢喜事精神爽等，对于当时得令嘅利物浦，上述祝福同样啱用，唔计今季夺得嘅欧超盃及世冠盃，单係佢哋恨到发烧嘅英超，红军已经放到甩辘，只要赢晒之后6场联赛，便可提早7轮封王，并事30年后再尝英格兰顶级联赛冠军滋味。
安帅主攻拖肥糖有起色
对于顺风顺水嘅红军嚟讲，未来嘅选择特别多，我认为佢哋有3个选择。首先，喺余下13轮联赛唔输兼捧盃，便可达到2003-04年度嘅阿仙奴全季不败封王嘅成就，甚至打破「兵工厂」跨季49场英超不败纪录；希望複製1998-99年度曼联3冠王（英超、英足盃、欧联）创举；或者退而求其次，就算失去其中一项盃赛，都仲有机会争逐另一项盃赛，连同坐定粒六嘅英超而荣膺双料冠军，有得拣零舍疏肝喇。
本周末英超首度实施歇冬期，将今轮赛事分两周进行，即係有10队今周有得抖，包括榜首利物浦，今晚英超其同市死敌爱华顿主场迎战水晶宫，「拖肥糖」自安察洛堤接手后明显有起色，可藉地利全取3分。
