葡萄牙除咗盛产C朗、费高等翼锋，近年亦係孕育名帅嘅沃土，前有「寸王」摩连奴，后有游历葡超、英超、中超及法甲嘅少帅保亚斯，查甸曾带领摩纳哥打破巴黎圣日耳门的垄断，而啱啱带队喺欧霸32强大胜爱斯宾奴嘅狼队主帅纽奴，同样不遑多让。
纽奴于球员时代出任门将，2004年摩连奴率领波图登上欧洲之巅，佢正係阵中后备门神，因此「寸王」都算係佢师傅。纽奴喺2012年展开教练生涯，其「成名作」必属两年后协助华伦西亚重夺欧联入场券，点知因翌季出闸脱脚遭炒鱿，其后重返母会波图执教1年，喺2017年毅然转教仍在英冠嘅狼队。
「拉丁帮」打出烧鹅味道
唔好以为狼队有个狼字就好勇斗狠，喺金牌经理人佐治文迪斯精心打造下，纽奴堆砌咗一个以蔗渣价钱、打出烧鹅味道嘅「拉丁帮」，无论係鲁尔柏迪斯奥、摩天奴、鲁宾尼维斯、迪亚高祖达定鲁尔占美尼斯，均属实而不华。当然，纽奴係有脑之人，尤其係战术调整方面，经常于势色唔对下，临场作出精準嘅调动而成功抢分，令狼队顺利升班，并于上季取得欧霸资格，今季喺联赛保持中上游位置，更喺欧霸进身淘汰赛，纽奴仲获得狼队所属地伍尔弗汉普顿嘅大学颁发荣誉博士，绝对係小人物成功故事。听晚狼队主场迎战诺域治，相信可「伊丝W」。
