周五澳职独脚戏有悉尼打吡，擂台趸FC悉尼主场迎战西悉尼流浪者；FC悉尼喺今届澳职大超班，主场更8战全胜无敌手，今季唯一败战就係作客输畀西悉尼流浪者，复仇决心令佢哋对今晚呢场打吡战更肉紧，黑柴推介1.65倍主胜。
（myTV Gold 302、Now 639、有线655及615台周五下午5时直播）
FC悉尼未有因为参战亚冠盃而影响联赛表现，近6场联赛全数报捷，而且入球分布愈嚟愈广泛，已经唔净係倚靠英格兰老将方祖同新西兰射手巴巴路西斯，今仗佢哋虽然有中场大将保罗列治累积5面黄牌停赛，但有前德国国脚中场鲍祖汉停满复出顶上，人脚仍算完整。
上次交手流浪者捱打
西悉尼流浪者喺加入澳职之初曾经屡有惊喜，不过近3季已见明显下滑，无力再挑战前列分子，今仗仲有门将赞积杜域、后衞韦马宁同中场马祖斯基等主力养伤，战斗力下滑。睇番首循环两军对垒，流浪者虽然喺主场凭米歇尔杜基奠胜赢1比0，但全场捱打，控球指数係三七之比，全场射门更加係一面倒嘅2比14，足见双方实力差距甚远，睇好FC悉尼可以喺主场复仇。
