正所谓「红」运当头，德甲同英超均由「红军」领导群雄。先讲今晚德甲赛事，榜首拜仁慕尼黑作客贺芬咸，德甲球队于今届欧洲赛认真威威，唔单止利华古逊同禾夫斯堡杀入欧霸16强，出战欧联嘅拜仁、多蒙特及RB莱比锡，亦顺利喺16强首回合赢波，其中拜仁更作客大破车路士3比0，尽显霸气。
拜仁当弗贺芬咸有难
自从汉斯弗利克中途接手后，拜仁连场报捷，重登榜首之余，亦搵到最佳阵容，加拿大翼锋艾方素戴维斯串演左闸，令人眼前一亮。甘美治则愈踢愈成熟，虽然近年多踢右闸，但今季重操故业出任防中，毫无生疏，呢位德国国脚既可死缠烂打，亦具备一定组织力，确有2014年世盃冠军队长拿姆影子，有佢同堤亚高艾简达拿站喺防线之前，有助理顺攻守，挟联赛近9仗8胜之气势，要赢贺芬咸冇难度。
至于夜少少开波嘅英超尾场，另一「红军」利物浦作客屈福特。屈福特经过早前一段「小阳春」之后，近期表现打回原形，之前5场联赛未赢过。利物浦喺上周中唔使出战欧联，可全力备战今仗，就算今季联赛冠军指日可待，亦有好多纪录等待佢哋打破，包括能否最快封王，曼市双雄曾经试过提早5轮捧盃，若果红军跟住4轮赢晒，就可以提早7轮夺冠，一定开行turbo，因此今晚两支德、英「红军」取胜在望。
