朗尼倒戈再战红魔！英格兰足总盃16强瞩目战，英冠打比郡主场越级挑战曼联，由美职回归英格兰嘅朗尼再遇旧主，只係「绵羊」打比郡目前实力同状态都好一般，难敌有咗波基斯费南迪斯后升呢嘅曼联，目前嘅红魔对盃赛特别上心，作客让得起1球、球半，黑柴撑上盘。（周五凌晨3时45分开赛）
朗尼年初加盟打比郡，担任助教兼队长，移后一格踢中场效果唔错，加盟初期球队成绩亦有所攀升，但踏入2月中后连续4场联赛未赢过，直至上仗对锡周三至重响胜鼓，至于英足盃上圈对住英乙嘅诺咸顿都要踢到重赛至过关，表现认真麻麻。
34岁嘅朗尼仍然保持曼联史上射手王纪录（253球），佢话自己仲深爱曼联，想曼联赢波同捧盃，但今场就当然例外，会全力以赴力争晋级。不过朗尼倒戈对曼联都唔係第1次，记得2017年佢效力爱华顿亦曾两遇曼联，但结果係两场输晒之余仲共吞6蛋。
红魔英足盃恰惯低组别
曼联人脚唔齐，保罗普巴、拉舒福特仲养紧伤，安东尼马迪尔亦有伤，不过新加盟嘅葡萄牙中场波基斯费南迪斯坚交到货，帮助曼联近8场取得5胜3和保持不败，而且「波费」最近3场都有波入，真係一个救全家。何况曼联近5次英足盃对非英超球队，全部都赢两球或以上，上圈大炒灿美尔6球，上周中欧联亦数布鲁日5蛋，可见佢哋盃赛遇弱绝不留手，今晚随时又兴奋到瞓唔着，同大家一齐数「绵羊」！
