被外界视为最有机会夺取今季英超冠军宝座嘅利物浦，上轮爆冷大败，今季联赛首次遇上挫折，亦终止佢哋44场不败纪录。「红军」周中足总盃作客又以0比2畀车路士淘汰，录得今季首次2连败。今晚重返主场迎战般尼茅夫，对球队上下嚟讲，要好好调整心态喺主场全取3分，重振近期低迷嘅士气。
上轮英超「红军」面对今季喺降班区域徘徊嘅屈福特，居然畀对手攻入3球，今场对住同样护级心切嘅般尼茅夫，绝对唔能够再掉以轻心。「红军」对上5次喺英超面对般尼茅夫全部赢晒，每场最少入3球兼不失一球，情况一面倒。般尼茅夫护级形势危殆，需要尽力抢分，上场主场更踢出漂亮一仗逼和车路士，斗志不容忽视。不过「般茅」今季作客极曳，近9场英超作客赛事只得1胜8负，而近7场作客赛事，亦有5场未能取得入球。
虽然利物浦手执半边英超奖盃盃耳，但係一日奖盃未到手，始终唔能够鬆懈。尤其依家肺炎疫情阴霾笼罩全球下，甚至传出英超随时因疫情而腰斩，唔少利迷都担心爱队首个英超冠军梦幻灭，所以「红军」必须做好自己，继续保持今季英超主场全胜佳绩。
