由於西甲巨無霸皇馬喺開季隨即出師不利連連失分，導致堪稱萬年不變嘅西甲積分榜前三把交椅喺戰罷6輪嘅情況出現咗新面孔-西維爾。不過單純靠其他隊伍出錯係唔足以暫列三哥位置嘅，西維爾喺開咧至今嘅表現亦確實值得稱道。而喺嚟緊嘅禮拜六晚上，誓要進一步追近身前兩強巴塞及馬體會嘅西維爾將會再次出擊，而對手則為狀態差到冇朋友嘅馬拉加，前者今鋪絕對有望為主場擁躉奉獻一場入波盛宴。
西甲6輪過後，馬拉加彷彿已經聞到一絲降班嘅危險氣息。皆因除咗艾拉維斯悉數落敗1分未得外，僅憑藉上輪聯賽迫和畢爾包攞到1分嘅馬拉加目前排名尾二，狀態實在令人擔憂。與此同時，相比主隊西維爾主場一向夠惡，馬拉加暫時則喺西甲作客積分榜墊底，後者今鋪想要爆冷攞分嘅希望可謂再度降低。再睇返西維爾，雖然聯賽不敗金身喺上輪被馬體會打破，但球隊隨即喺本週中歐冠賽場攞馬里博爾嚟祭旗，其中射手賓耶達更加大演帽子戲法，脆過威化餅嘅馬拉加後防線是役想要阻擋佢恐怕難度甚大。另外，與兵多將廣嘅西維爾唔同，本身可用人手已經少之又少嘅馬拉加今仗更加有中場大將古斯曼奴域被罰坐波監，此番西維爾之行結果如何已經基本可以蓋棺定論。
至於盤路方面，由於西維爾踢法一向進取，而馬拉加開季至今防線表現之差亦無需多講，加上雙方過去3次交手總入球數最少都有3波，今鋪大力支持上盤絕對係明智之選。同時如果話想串返條過關飛，西維爾亦勢必會係鐵膽好選擇。
