正所謂問君能有幾多愁，古人就話藉此嚟感歎人生無常嘅哀歌，但今時今日嘅意甲賽場同樣有一班球迷愁爆。作為AC米蘭嘅擁躉喺今季絕對唔好過，皆因球隊開咧至今走勢差到冇朋友，如果嚟緊下禮拜一凌晨未能喺卡利亞里地頭笑到最後，AC恐怕日子會更加唔好過。
用屋漏偏逢連夜雨嚟形容如今嘅AC相信絕不為過，佢哋經過去年夏天嘅連番引援一度成為爭冠熱門之一，但20輪過後僅列11名嘅戰績恐怕連最悲觀嘅球評家都未能預測。而且班主李勇鴻近期被傳深陷資金危機，AC隨時會遭遇掛牌出售嘅悲慘下場。不過場外嘅事情球員就話無能為力，但球場內嘅事情就可以話係責無旁貸。雖然喺短暫嘅歇冬期前擊敗克羅托內重返勝軌，但對於此前失分連連嘅AC嚟講亦僅屬杯水車薪。不過本輪賽事走訪排名接近降班區域兼且上一次聯賽主場稱雄已經要追溯到上年11月頭嘅卡利亞里，AC確實迎嚟咗連勝嘅契機。雖則爭冠已成泡影，但如果持續插水實在係無面。
睇返人腳上，主隊卡利亞里有進攻欲望不俗嘅中場祖奧柏度被罰坐波監，對於過去4輪聯賽3次吞蛋嘅佢哋嚟講影響頗大。至於AC，雖則後衛安德列干迪和中場荷西馬奧尼因傷高掛免戰牌，但球隊班底厚度足以彌補相關位置嘅輪轉。而且喺狀態提升嘅攻擊手卡漢路古嘅帶動下，AC進攻力度顯然喺卡利亞里之上。目前澳彩亞洲讓球盤開出AC讓半球嘅盤口，各位波友不妨再對佢哋投下信心一票。
