隨住巴黎聖日門今季順利復辟江山，法甲冠軍誰屬嚟到4月份已經毫無懸念可言。不過咁樣並唔代表法甲已經無嘢可關注，其中嚟緊下週一凌晨就將上演一場歐戰資格爭奪戰，屆時同樣排名積分榜前列嘅馬賽及蒙彼利埃將在前者地頭一決高下。兩隊如今都求勝心切，各不相讓嘅局面應可預期，和味確實湧現。
對於蒙彼利埃粉絲而言，球隊今季表現其實已經交到功課，對比上季飽食降班驚風散之苦，蒙彼利埃如今甚至有機會爭奪來季歐霸入場券，戰意如何無需多講。至於主隊馬賽，論牌面球隊肯定在蒙彼利埃之上，加上主場一向甚惡，取勝看似水到渠成。可惜球隊今仗不僅有包括門將文當達、中堅艾迪拉美和中場泰奧雲齊齊因傷避戰，同時上仗聯賽有波入嘅攻擊手奧甘普斯是役又因黃牌滿額被罰坐波監，球隊三線實力勢必有所影響。另外更為關鍵嘅因素係，馬賽喺下週中將需要分心應付歐霸盃半準決賽與德國實力份子RB萊比錫嘅次回合賽事，由於首回合作客落敗，馬賽如今可謂背水一戰。即使球隊如今喺聯賽中同樣需要搶分爭二保三，但此番面對有備而來嘅蒙彼利埃，馬賽實在難有必勝把握。
至於今仗賽事嘅焦點球星對碰上，由於隊內頭號射手泰奧雲嘅缺席，馬賽今仗將會更加需要依靠中場皮耶特嘅串聯組織能力，力求幫助球隊搵到入波之匙；而喺蒙彼利埃方面，賽季至今聯賽貢獻雙位數入波嘅攻擊手基奧雲尼古爾同樣值得重點留意，過去兩仗聯賽攻入3波嘅呢位科特迪瓦球星如今狀態十足，絕對會係馬賽後防線今仗嘅心腹大患。
另外喺盤路方面，礙於今仗和味甚濃，如果想話串返條過關飛嘅話，本場和局絕對係鐵膽嘅不二之選，至於波膽上，兩隊今季都較為偏愛開出1比1嘅賽果，各位波友不妨留意。
