嚟緊禮拜六晚上喺廣州越秀山體育場又有中超好戲上演，近來逐漸重返正軌嘅地頭蛇廣州富力將會與來者不善嘅上海申花碰面。雙方整體實力較為接近，彼此亦都同樣依賴外援群搵食，一場惡鬥在所難免。
喺此前慘遭聯賽三連敗後，痛定思痛嘅富力於此前9日之內喜迎中超及中國足協盃雙線三連勝，一掃隊內陰霾。但正如睇人都唔可以就睇表面，富力喺呢波連勝當中含金量其實未算十足，足協盃兩支低組別手下敗將武漢楚風合力和瀋陽城市建設實力去到邊相信大家都心中有數。而且當家射手沙希域近期喺聯賽中迎嚟罕見嘅入球荒，導致球隊如今只能寄望另一位攻擊手連拿天奴承擔起更多責任。與此同時，富力今仗對手申花亦並非等閒之輩，啱啱重返勝軌嘅佢哋目前正對積分榜前四位置虎視眈眈，甚至距離一哥上海上港都只有唔到兩場波嘅差距。而且一向傳得又射得嘅哥倫比亞大將基奧雲尼摩蘭奴上仗正正為球隊攻入致勝球，今鋪羊城之行，申花亦絕對唔會坐以待斃。
睇返過去兩次雙方喺富力地頭進行嘅聯賽，賽果均無一例外係激戰成和，今仗繼續大吹和風亦絕不出奇。同時如果話想串返條過關飛，今鋪標準盤和局亦勢必係鐵膽好選擇。
