曼联踩场拔刺
英超周中快车今晚上演「Big 6」大战，由热刺主场火併曼联。热刺岩岩喺英足盃畀英乙纽波特郡逼和搞到要重赛，战果或多或少反映佢的今季飘忽嘅演出，加上热刺首循环面对其馀Big 5球队战绩算曳，只得1胜4负；客军曼联获「A山」阿历斯山齐士加盟后，进攻更灵活多变，热刺有主场之利都未必有甜头，曼联受让平半必捧1.9倍下盘！
哈利仔单天难保至尊
热刺近期表现略见回落，继上轮英超畀修咸顿先破门下，作客逼和对手仅得1分后，几日前出战英足盃再出现类似情况，又系先失波，爆冷畀英乙球队纽波特郡赛和1比1。赛果反映热刺防守唔集中之馀，亦显示球队进攻方面欠缺稳定性，尤其被寄予厚望嘅迪利阿里今季状态极为反覆，影响球队进攻强度，王牌射手哈利卡尼虽然连续4仗有波入，但中场大脑基斯甸艾历臣据报有伤上阵成疑，喺缺乏支援情况下，今晚靠「哈神」单打独斗，未必佔到甜头。
曼联喺冬季转会窗送走不受重用嘅米希达利恩，换嚟「A山」加盟，令莫连奴喺中前场嘅配搭有更多选择，事实上「寸王」喺记者会都表示自己正陷入「幸福嘅抉择」，而且呢位智利前锋上仗英足盃首演表现对办，贡献两个助攻协助球队晋级，睇嚟佢同班波嘅默契建立得比想像中快，亦肯定可以为曼联进攻注入新元素。
红魔近5仗全胜冇失波
曼联英超落后榜首曼城12分，争标比较渺茫，但足球世界羊都有可能发生，最紧要做好自己，场场以3分为目标，先求收窄同曼城嘅差距。曼联所有赛事已录得5连胜兼冇失波，前锋安东尼马迪尔近3仗联赛有波入，配合新兵「A山」及高大中锋卢卡古，仲有位近期脚风劲顺嘅连格，无论状态同质素都唔输蚀畀热刺，今晚随时赢埋仲得，受让平半必捧下盘！
