留力欧联古天奴担正抢fo
今晚年初二西甲，「1哥」巴塞隆拿作客伊巴。巴塞虽然嚟紧周中有欧联对车路士嘅顾虑，但近期联赛频频失分，畀次席马德里体育会系咁追，谷住成肚火必向伊巴发洩，让球客胜有买趁早。
好多人都话今季西甲冠军已成巴塞囊中物，不过佢的连续2场联赛被爱斯宾奴及基达菲闷和0比0，已经畀次席马体会愈追愈近，依家只落后7分，绝对唔系坐定粒六，难怪主帅华尔维迪都话唔好大意。
虽然巴塞嚟紧周中有欧联16强首回合要作客车路士，今仗有可能收起王牌美斯嘅情况下，亦代表佢的唔搏，特别系季中加盟、但冇得参加欧联嘅巴西中场菲腊比古天奴，更加唔使勒住勒住，势必尽骚哥利。
伊巴遇强即屈
「7仔」伊巴近4仗联赛未输过，好似好威咁，但佢的遇强即屈，今季对住巴塞、皇马、马体会等劲旅全部输晒，尤其系对亲巴塞例冇运行。双方近4次交手，伊巴唔单止输晒，总共失左18球，仲全部都至少输2粒，包括首循环大败1比6，真系未踢都脚仔软。巴塞近期战绩回落备受批评，已经嬲嬲的，必定搵伊巴祭旗，为出征欧联前壮行色，让球客胜捧得过。
