兵多将广剑指4冠王
英格兰足总盃16强压轴大战,有英超「一哥」曼城作客甲组嘅韦根,虽然话足总盃已经唔系豪门嘅主要目标,不过「蓝月亮」胜在兵多将广,擸多个冠军都唔系问题,何况佢的有多位主力伤愈复出,今仗可以强阵「除根」,让2球湿湿碎,捧2.25倍让客冇甩拖!
曼城今季目标直指4冠王,英超依家坐稳榜首、联赛盃已经杀入决赛、岩岩喺欧联16强首回合亦大炒巴素利,各条战线都顺风顺水,英足盃当然唔需要就住踢。事实上,曼城领队哥迪奥拿喺呢个盃赛虽然有轮换,但都有唔少核心带住,好似奇云迪布尼、史达宁等上一圈都有正选披甲,可见曼城绝对无意放软手脚。
曼城近期更有多位伤兵接连康复,利莱辛尼同大卫施华上仗已经后备上阵,日前更有巴西射手加比尔捷西斯复操,今仗有机会落场,令曼城阵容更加鼎盛。「蓝月亮」近4场比赛有3场大炒对手3球或以上,气势劲到冇朋友,对住低两班嘅韦根自然大胜可期。
韦根连输两场状态曳
韦根喺今届足总盃表现唔错,踢走过般尼茅夫同韦斯咸2支英超球队,不过今次对手明显唔同级数,而且韦根近期状态正值下滑,连续2场联赛输波而回,今仗更有前锋摩斯停赛,3名新兵占士禾汉、迪云特高尔同丹尼尔斯亦唔符合上阵资格,试问边有能力抵挡曼城?