新季今晚揭幕
新一季日职周五晚揭开序幕，打头阵嘅有鸟栖砂岩主场迎战神户胜利船。砂岩今季将沿用上季主力班底出战，夹惯夹熟默契肯定不俗，加上砂岩近5次面对胜利船取得3胜2和嘅不败往绩，呢场对住名大于实嘅胜利船取胜冇难度，睇好佢的取得赛季开门红，主胜唔好错过。
上季以第8名过终点嘅砂岩绝对系主强客弱，单计联赛17仗主场出击取得11胜1和5负，主场成绩排日职第4，仅次于川崎前锋、鹿岛鹿角同大坂樱花几支联赛前列分子，表现算系对得住入场睇波嘅球迷，水准咁稳定，赛季首战肯定希望乘主场优势取胜。虽然前锋丰田阳平因同主帅不和，离队转战韩职，不过佢上季已经鲜有上阵机会，所以影响应该唔会好大，加上主力班底都选择留队，包括首席射手兼中场核心原川力，以及一对箭头域陀伊巴保同赵东建，实力依然雄厚。
神户「巴塞化」自己捉虫
神户胜利船上季高调引入前德国国家队射手普多斯基，可惜雷声大、雨点小，最终只系以第9名完成赛季，排名仲低过砂岩，佢的新球季一口气引入8位新兵，仲打正旗号踢法要玩「巴塞化」，更订立联赛跻身前五、盃赛攞个冠军嘅目标，可惜人脚变动太大，默契肯定输砂岩好几条街，而且东施效颦学「地上最强」搓波，更加衰多几钱，呢场作客难有胜算，捧番主胜好过。
