沙拿争金靴入球停不了
周六晚英超有多场好戏上演，其中利物浦将会主场对韦斯咸。众所周知，红军今季有前冇后，联赛入球数仅次「1哥」曼城，弊在一班后卫不时梦游球场，搞到近4仗主场联赛中，有3次总入球都系4球或以上，呢场面对防守同样麻麻嘅韦斯咸，中位数3.5球嘅入球大最稳阵。
对球迷嚟讲，爱队赢到波固然重要，如果仲可以入多几粒，就梗系拍烂手掌，今季利物浦fans可以话有「50%幸福」，因为红军喺不嬲主攻嘅领队高普调教下，进攻体系已经成熟，精彩入球不绝，好似岩岩喺欧联就以5比0炒起波图，沙迪奥文尼仲一口气入左3粒，气势劲到冇朋友。讲到利物浦最弗嗰个，就一定系穆罕默德沙拿！呢位「埃及美斯」今季喺射手榜同热刺哈利卡尼斗得精彩，已连续5场波有士哥，值得一提嘅系，沙拿喺英超首次梅开二度，就正正系首循环作客赢韦斯咸4比1嗰场，今场回师晏菲路再战，为争金靴随时省多几粒都唔奇。
不过，利物浦防守方面始终未见起色，即使重金买入中坚华基尔云迪积克，但佢无论拍住洛夫云抑或祖尔麦迪比，「派胶」情况屡见不鲜，随时呢头入完转头就失波，1.14倍热W同让球主胜「-2」一样买唔落手。
韦斯咸有力驳火
另一边厢，「锤仔帮」韦斯咸今季后防表现一般，系英超失球数第4多嘅球队，今仗仲有后卫马苏亚古停赛，对住火力咁猛嘅利物浦想唔失波都难。好彩佢的嘅攻击组合有货交，包括畀领队莫耶斯点醒左嘅阿拿奥杜域，仲有近4仗入3球、状态复甦嘅「小豆」查维亚靴南迪斯，面对红军一班「慌失失」后防，要数胡唔难，加上两队近3次交手总入球都系开4球或以上，有埋往绩支持，今场大家可以买定花生等睇入球骚，中位数3.5球大盘值捧。
