欧霸出局心伤脚软
今晚赛事戏码唔错,阿King重点推介意甲卡利亚里主场对拿玻里,睇牌面拿玻里远胜一筹,但要留意呢支劲旅有「欧战后脚软症」,特别系近5次踢完欧洲赛后,喺紧接嘅联赛,总入球都系两球或以下。拿玻里刚于上周中欧霸盃力战之下出局,未必回得切气,最好拣入球细。
拿玻里喺上场欧霸盃32强次回合搏到尽,作客以2比0击败RB莱比锡,两回合计打和3比3,但拿玻里因为作客入球唔及对手多,黯然出局,认真打击士气。睇番拿玻里近5次欧洲赛后紧接嘅联赛,都有「死火」情况发生,其中3次打和0比0,2次小胜1比0,恐怕今场炒唔起卡利亚里。
卡利亚里近7次主场只有1胜1和5负,当然斗唔过拿玻里,相信只能死守,希望偷鸡攞到分。卡利亚里曾于1月联赛主场对另一支劲旅祖云达斯,踢到下半场中段先至失守,仅负0比1,所以今场未必会大败。拿玻里客W赔率乏味,上盘风险亦高,最好拣入球细。
士砵亭够炒摩里伦斯
葡超方面,布拉加近两次主场对唐迪拉都赢两球或以上,摆明格食格,可直取让球主胜。另一场,士砵亭今季联赛主场12战取得10胜2和,近6场联赛主场更全胜兼冇失波,有力大炒摩里伦斯,士砵亭让到两球都要让球主胜。